Jam 1 | BOJ | STEP | E Jems. E Qotei wo Tamo Koba Yesus Kristus wo naŋgo wau tamo. Niŋgi Israel naŋgo moma utru 12-pela naŋgo leŋ deqaji. Niŋgi nuŋgo segi segi qure utru uratosib jaraiosib sawa sawa kalil keretosib di unub. Deqa e na anjam endi neŋgreŋyosim niŋgi qa qariŋyonum. O was niŋgi kaiye.

James 1

1 E Jems. E Qotei wo Tamo Koba Yesus Kristus wo naŋgo wau tamo. Niŋgi Israel naŋgo moma utru 12-pela naŋgo leŋ deqaji. Niŋgi nuŋgo segi segi qure utru uratosib jaraiosib sawa sawa kalil keretosib di unub. Deqa e na anjam endi neŋgreŋyosim niŋgi qa qariŋyonum. O was niŋgi kaiye.

Iga gulube qoboiyeqnum dena iga siŋgila eqnum

2 O ijo was qu, gulube utru segi segi gargekoba niŋgi qa boqnimqa uŋgum niŋgi endegsib are qaloqniye, “Iga gulube deqa areboleboleigim sqom.” 3 Gulube deqaji niŋgi qa boqnimqa niŋgi Yesus qa nuŋgo areqalo bole siŋgilatqab kio sai kio di Qotei a unqas. Niŋgi qalie, gulube dena niŋgi siŋgila eŋgoqnimqa niŋgi siŋgila na tigeloqnsib gulube qoboiyoqnqab. 4 Ariya niŋgi bati gaigai siŋgila na tigeloqnsib gulube qoboiyoqniye. Yimqa nuŋgo kumbra di tulaŋ kobaoqnimqa niŋgi Qotei aqa kumbra bei qa truquqasai. Niŋgi aqa kumbra kalil qa tulaŋ kere na sqab.

Tamo bei a powo qa truquosimqa a Qotei pailyim Qotei na powo yqas

5 Nuŋgo ambleq di tamo bei a powo qa truquosimqa a Qotei pailyem. Yimqa Qotei na a powo yqas. Niŋgi qalie, Qotei a gaigai tamo kalil naŋgi iŋgi bole bole enjreqnu. Naŋgi pailyeqnab a naŋgi qa olo ŋiriŋosaieqnu. 6 Ariya tamo di a Qotei pailyqa osimqa a areqalo aiyeltaiq. Osim endegsi maraiq, “Qotei na iŋgi di ebqas kio sai kio?” A degsi maraiq. A Qotei qa aqa areqalo siŋgilatosim areqalo qujaitosim pailyem. Jagwa tigelosiq yuwal korkortoqnsiqa oqe aieqnu dego kere tamo areqalo aiyelteqnu qaji a bati bei aqa areqalo siŋgilatoqnsiqa olo bati bei aqa areqalo siŋgilatosaieqnu. 7 Tamo deqaji naŋgi endegsib are qalaib, “Tamo Koba Qotei na e iŋgi bei ebqas.” Sai. Qotei na tamo deqaji naŋgi iŋgi bei enjrqasai. 8 Tamo deqaji naŋgo areqalo niñaqejunu deqa naŋgi kumbra bei bei laŋa yeqnub. Naŋgi kumbra qujai dauryosaieqnub.

Jems a na tamo iŋgi iŋgi saiqoji unub qaji naŋgi ti tamo ñoro koba ti unub qaji naŋgi ti anjam minjrej

9 Nuŋgo ambleq di Kristen was bei a iŋgi tulaŋ saiqoji unu. Di uŋgum. A Qotei aqa ŋamgalaq di ñam koba ti unu. Deqa a areboleboleiyeme. 10 Ariya tamo bei a ñoro koba ti unu. Di dego uŋgum. Qotei na aqa ñam olo aguq atimqa a dego arebolebolei-yem. Di kiyaqa? Tamo naŋgi ñoro koba koroiyqajqa arearetnjreqnu qaji naŋgi balamtamo aqa so bul mandamq endia sokiñalaysib moreŋqab. 11 Iga qalie, seŋ oqsim kaŋkaŋamqa balamtamo aqa so laosim moiqas. Yim aqa wala bole di koboqas. Dego kere tamo naŋgi ñoro koba ti unub qaji naŋgi wauoqnsibqa bati qujai qa naŋgi urur moreŋosib koboqab.

Qotei na iga iŋgi bole bole egeqnu. A na iga une yqajqa deqa are qametgosaieqnu

12 Tamo naŋgi siŋgila na tigeloqnsib gulube qoboiyeqnub qaji naŋgi areboleboleinjreme. Di kiyaqa? Naŋgi gulube kalil di gotraŋyoqnsib siŋgila na tigelesqab di Qotei na awai boledamu enjrqas. Yim naŋgi ŋambile gaigai sqab. Agi Qotei a marej, a na tamo kalil a qalaqalaiyeqnub qaji naŋgi awai bole enjrqas. 13 Tamo bei a une atqa are prugyimqa a endegsi maraiq, “E Qotei na are qametbqoqa une yonum.” A degsi maraiq. Tamo bei na Qotei aqa are qametim a une yqa keresai. Dego kere Qotei na tamo naŋgi une yqajqa are qametnjrosaieqnu. 14 Gago segi segi are miligi tigeloqnsiqa iga titgeqnu. Gago segi areqalo uge na iga walawalaigoqnsiqa gisaŋgeqnu. Yim iga une atqajqa deqa. 15 Ariya gago are miligi tigeleqnu di uŋa a gumaŋeqnu dego kere. Bunuqna uŋa a aŋgroteqnu dego kere gago are miligi tigeloqnsiqa une babteqnu. Yeqnaqa gago une di tulaŋ kobaeqnaqa iga moio gam tureqnum.

16 O ijo was bole, une aqa kumbra dena niŋgi gisaŋgaim deqa niŋgi une kalil uratiye. 17 Iŋgi bole bole kalil iga eleŋeqnum qaji di tulaŋ boledamu. Iŋgi iŋgi kalil di laŋ goge dena branteqnaq iga laŋa eleŋeqnum. Qotei Abu riaŋ ti unu qaji a na iŋgi iŋgi di qariŋyeqnaqa gagoq aieqnu. Qotei Abu a kumbra bulbulyosaieqnu. A seŋ qunuŋ bul sai. Agi seŋ qunuŋ a olekobaoqnsiqa olo truqueqnu. Qotei a degyosaieqnu. 18 A aqa segi areqalo na iga gereigej. Deqa a gago Abu. A aqa segi anjam bole na iga gereigej. Yim iga na iŋgi iŋgi kalil a gereinjrej qaji di buŋnjrsim naŋgo namoq di sqajqa deqa.

Iga Qotei aqa anjam laŋa quqwasai. Iga quoqnsim dauryoqnqom

19 O ijo was bole, niŋgi ijo anjam endi geregere qalieosib soqniye. Niŋgi anjam bei marqa osib urur medabu waqtaib. Mati didaboqniye. Urur minjiŋ oqaiq. 20 Di kiyaqa? Tamo naŋgi minjiŋ oqetnjreqnu qaji naŋgi Qotei aqa kumbra tiŋtiŋ dauryqa keresai. 21 Deqa kumbra uge uge jigat kalil gaigai nuŋgoq di branteqnu qaji di niŋgi taqal waiyoqniye. Osib nuŋgo segi ñam aguq atoqnsib Qotei aqa anjam a nami nuŋgo are miligiq di atej unu qaji di niŋgi ojesoqniye. Ojesqab di Qotei a nuŋgo qunuŋ oqas. 22 Ariya Qotei aqa anjam niŋgi ojejunub qaji di torei dauryoqniye. Laŋa qusib olo urataib. Niŋgi laŋa quqwab di niŋgi nuŋgo segi jejamu gisaŋyqab. 23 Tamo bei a Qotei aqa anjam laŋa quoqnsiq olo dauryqa urateqnu di a tamo ya jeqiloq di aqa ulatamu uneqnu dego bul. 24 A ya jeqiloq di aqa ulatamu unsim olo puluosim giloqnsim aqa ulatamu unqo qaji di olo are walyqas. 25 Ariya Qotei aqa dal anjam a tulaŋ bole tiŋtiŋo. Dal anjam dena gago une aqa siŋgila kalil kobotetgeqnu. Deqa gago une dena iga olo titgosaieqnu. Tamo naŋgi Qotei aqa dal anjam di geregere peleiyoqnsib dauryoqnqab di Qotei a naŋgo wau kalil tulaŋ boletoqnqas. Ariya tamo naŋgi Qotei aqa dal anjam di laŋa qusib olo are walnjrqas di Qotei a naŋgo wau boletqasai.

26 Tamo bei a endegsi are qalqas, “E gaigai Qotei qa loueqnum. Deqa e Kristen tamo bole.” Ariya tamo di a aqa segi medabu geregere taqatosaieqnu. Aqa kumbra dena a na aqa segi jejamu gisaŋyeqnu. Deqa a Qotei qa loueqnu di a laŋa loueqnu. 27 Iga Kristen tamo uŋgasari iga kumbra bole endeqaji yoqnqom. Iga na aŋgro mandum naŋgi ti uŋa qobul naŋgi ti geregereinjroqnsim naŋgo gulube kalil qoboiyetnjroqnqom. Osim iga gago segi walwel geregere taqatosim mandam endeqa kumbra jigat kalil uratekritqom. Iga kumbra degsi yoqnqom di iga Qotei aqa ŋamgalaq di Kristen tamo boledamu une saiqoji sqom.